編按：繼〈毋通放袂記－台語系出業生ê心事〉之後，台中教育大學台灣語文系第一屆畢業生、也是國小台語代課老師的蔡幸紋，目前代課的地方正是她的母校，也是獲今年全國少棒冠軍 、再度拿到世界威廉波特亞洲區資格賽台灣代表權的高雄市復興國小。 透過這篇台語散文，她跟學生們約定，今年夏天一起重返威廉波特！也請大家在7月8號那天為代表台灣出國比賽的復興國小棒球隊加油喔！

「嬴啊！贏啊！恭喜咱學校棒球隊tú-tsiah得著全國少棒冠軍，提著世界威廉波特亞洲區資格賽台灣代表權。咱beh koh一遍kā世界冠軍嬴轉來！」佇一個tsiok熱ê下晡，學校放送器傳來主任激動ê聲音。

2010年5月11號，高雄市復興國小扑敗台東縣卑南國小，得著謝國城盃全國少棒錦標賽冠軍，代表台灣參加世界威廉波特少棒亞太區資格賽。（照片取自：自由時報／記者王藝菘攝）

 台灣人對棒球ê熱情毋知是對當時開始tsiah-nih痟（瘋狂）？可能真儕人ê記持koh tiâu佇3、40冬前紅葉少棒提著世界冠軍，全國半瞑毋睏佇電視機頭前看現場轉播ê年代。台灣有一tsām確實是靠棒球ê力量予咱khia（站）佇國際ê舞台上，予世界各國知影有一個叫「台灣」ê國家。

毋過，對一寡『七年級』甚至koh較幼齒ê少年人來講，tsia-ê經驗對阮來講是有淡薄仔遙遠。我家己對棒球上早ê記持，是對國校開始，我ê母校復興國小是高雄市少數有飼球隊ê學校（註1），自1985年開始成隊，一直到taⁿ。老實講，佇我回想彼時，並無因為學校有棒球隊煞有特別ê感覺。彼當陣，棒球隊kap阮一般學生無特別分開，每一班攏有tshap一、兩個棒球隊同學，阮對in ê印象並無儕，in大部分ê時間攏是「失蹤」--e，毋是佇隔壁勞工公園ê棒球場練球，著是佇學校內底走（跑）運動埕，逐家攏曝kah烏lu-lu，規身軀臭汗酸味。棒球隊攏查甫囡仔，講話大嚨喉空，阮攏會感覺in是leh kā人kiāu（罵髒話的動詞）亦是『講髒話』。總是，一般學生加減會認為棒球隊攏是無愛讀冊tsiah會『淪落』去扑球，是一陣真歹管教ê歹囡仔，是老師心內ê「問題學生」。

想袂到tsiah-ê人攏總變成我人生第一齣台語創作小說〈彼年的熱天〉（註2）ê主角，佇2冬前beh投稿教育部台語創作獎，對國校畢業beh 10幾冬，離開復興國校tsiah-nih久ê時間，棒球隊suah是我唯一ê記持，我開始想beh kā這攏寫入去小說內底。我翻頭開始tshiau找tsiah-ê記持，利用歇睏轉去學校，拜六禮拜ê校園，棒球隊猶原佇熱piak-piak ê運動埕練球；球猶原會ùi後門ê門縫liàn出去（滾出去）外口ê菜市仔；教練ê聲sàu猶原tsiah-nih歹，一切一切，攏總kap 10冬前ê記持相仝無改變。佇小說著獎ê彼年熱天我tú好入去復興國校實習，了後接全校台語科任老師一直到tsín（現在），當然包涵全校ê體育班（復興國校後來kā羽毛球kap棒球隊合做體育班，ùi三年級到六年級攏有）。活佇我印象中ê棒球隊úi同學變做我ê學生，原來in毋是上課愛tuh-ku（打瞌睡）是因為in  5、6點著愛起床練球，下晡下課繼續練到日頭落山。雖然定定比賽練球，學業程度一直比普通班級後壁。毋過，佇我ê台語課體育班上課總是上有規矩、上認真，佇學校上有禮貌上大聲喝「老師好」嘛是in。按怎嘛想袂到有一工我真正變成家己寫ê小說內底ê靜文老師，有機會成做棒球隊ê老師。

復興國校棒球隊自我佇hia讀冊一直到我tsit-má koh轉去教冊，佇tsiah-nih長ê時間攏從來無斷過，一冬過一冬，一屆過一屆（註3），曾經佇1996年代表台灣提著台灣上尾遍ê世界威廉波特少棒冠軍（註4），tshiaⁿ-iāⁿ（風光）ê紀錄koh留佇台灣ê棒球史頂kuân，毋知台灣有外儕人知影tsit件代誌。毋過，永遠會記得佇我三年級ê時阮hia棒球隊同學頷頸褂花箍khia佇吉普車頂kuân遊街，炮仔聲pōng kah足大聲，in笑kah足歡喜。咱一直攏共這個畫面記tiâu-tiâu，已經囥（放置）beh 14冬，這是復興國小少棒隊有史以來上好ê紀錄也是留予台灣上尾ê記持。

高雄市勞工育樂中心（勞工公園）附設棒球場是復興國小棒球隊長久以來ê固定練習場地，真儕優秀ê選手kap驚人ê成績，攏是佇tsia辛苦流汗磨練出來ê。

雖然這幾冬復興國校棒球隊佇台灣全國性比賽無像卡早tshiaⁿ-iāⁿ，毋過，ùi勞工公園棒球場的鐵網仔縫看入去，逐家辛苦練球ê形影毋捌消失過。毋知當時開始球場外口搭（tah）一領真大ê布phâng（帆布），佇布phâng內底練球ê恁攏有仝款ê心願kap目標，著是布phâng頂彼kuân彼幾個大大ê紅字。

彼工下晡全校停課，著親像40年前規暝無睏為著beh看轉播仝款痟，逐間教室攏共電視扑開，替學校棒球隊加油。佇上尾局，2：2，全校ê心情嘛綴恁起起落落，佇最後衝入來關鍵一分，學校一陣phok仔聲，我ê目睭嘛有淡薄仔tâm-tâm。迎接恁ùi台北轉來ê炮仔聲，kap 14冬前仝款，hiah-nih響hiah-nih大聲。隔14冬--a，這遍kan-ná是咱離心願上近ê一遍，掛佇練習球場ê布phâng猶原予日頭tshio（照）kah足光，恁準備佇7月8日去印尼參加亞太地區資格賽，若是順利著會使去美國參加咱等真久ê世界威廉波特少棒錦標賽。這是咱今年熱天ê約束，會使做恁ê學姊、恁ê老師，我感覺光榮！

請逐家替高雄市復興國小棒球隊加油，台灣棒球加油！（註5）

2010年5月13日早起，炮仔聲pin-piang叫，全校師生排列迎接全國冠軍光榮倒轉來。

註1：高雄市復興國小棒球隊網址：http://classweb.fhps.kh.edu.tw/dyna/webs/index.php?account=baseball
註2：我ê台語小說得著第一屆教育部台語文學創作小說類學生組第二名，作品收錄佇作品集內底。
註3：培養出ê優秀選手其中，職棒選手有彭政閔、陳懷山、張家浩、周森毅、王崇燿、郭柏丞、蔣智聰、高俊強等；旅美選手鄭錡鴻、武昭關、蔣智賢、陳家駒(紅襪)、陳品捷(小熊)等。
註4：世界少棒聯盟（Little League Baseball，簡稱LLB），台灣佇1969年第一遍參賽，由台中市金龍少棒隊奪得頭遍冠軍，歷屆攏總得過17遍冠軍，上尾遍著是1996年由高雄市復興國小代表。

註５：棒球隊出國比賽真需要經費，希望大家若是願意會使加減贊助，幫助台灣小球員提著世界冠軍轉來。聯絡方式：高雄市民權二路331號(TEL)335-1784

◎作者簡介：

蔡幸紋，七年級中段班ê打狗日頭美少女。自細漢生活佇路大條、海港闊、日頭炎ê城市，所以成做講話大嚨喉空、笑起來足大聲ê阿沙力性格。台中教育大學台語系第一屆畢業生，目前高師大台灣文化語言研究所學生，ná佇國小做台語代課老師趁學費