台灣文學館「台灣本土母語文學常設展」，tī 前任館長鄭邦鎮任內籌劃tang guā（一年多），tsit ê常設展按2010年4月24日開幕了後，一直beh展 kàu 2015年4月23日，頭尾lóng-tsóng（共）5tang。 這符合聯合國教科文組織（UNESCO）2002年發布ê「文化多樣性宣言」。 

雙月刊《首都詩報》本期（第4期）頭版上半部；刊登真理大學學生為逝世週年的作家陳恒嘉先生創辦「阿嘉同學會」之報導，以及作家杜文靖於今年3月逝世消息。

根據UNESCO ê報告，in已經kā台灣列入母語滅絕ê危機地區--ah，學者調查台灣本土語言使用了後mā講，台語、客語lóng有真tsâm-gâm（極其嚴重） ê流失現象，ah若原住民族語已經行向滅絕ê路--ah，tse是因為台灣長期khiā tī外來文化霸權ê壓制ē-kha（之下），所產生ê惡果。

《首都詩報》本期刊載之「台灣本土母語文學常設展」消息。

台灣社會有多元族群，有phong-phài（豐盛）精彩、豐富tshiⁿ-tshioh（多采）ê文化。照理講tī文學表現頂頭，實ài有多元交響、百花tsiâu開，來呈現tak-ê族群ê特色。毋koh佇主流文壇接受母語文學ê過程，suah發生kuí-nā-kái（好幾次）saⁿ-tsèⁿ（論爭），sui-bóng反對koo7（以）台灣本土母語創作ê人mā有講kuá in反對ê理路，毋koh in mā 顛倒予母語文學創作ê理論基礎khiā koh-khah tsāi（成熟趨穩），致使母語創作tsiâⁿ做像文學大老葉石濤所講--ê：「文學用母語來寫，是正當--ê，ā著是講1 ê族群用家己ê母語來創作是應該--e，親像原住民用原住民語來寫小說，tse是無siáⁿ thang討論--ê。」Tse kiau 1930年代黃石輝大聲叫人koo7（以）台灣話文創作kāng款ê理路。

2010年4月24日於台灣文學館的「台灣本土母語文學常設展」開幕式之原住民表演。（照片提供：陳理揚）

咱面對母語tsâm-gâm流失kap伊復振ê問題，tī各國，有真tsē解決問題ê舊例予咱thang有樣看樣，lāi-té（其中）有1項kài有效ê法度，著是鼓舞作家koo7（以）in家己ê母語來創作文學作品，予母語koo7（以）文學作品來kā in傳承--落-來，thang予tsia-ê作品發揚in ê精神，發揮in ê影響力，koh予民眾自覺母語保存先人智慧ê可貴，予民眾tsai-iáⁿ母語維護族群命脈ê要緊，beh siàn tse mā是kài-tsē（很多）著著（得到）Nobel文學賞ê作家，koo7（以）母語創作文學作品ê主要 in-tuaⁿ（原因）ê 1項。

常設展一隅，客語文學區。（照片提供：陳理揚）

台灣本土母語文學經過無停ê著磨歷史，koh因為tsit-tsām母語作家ê打拼，hām保護母語ê普世價值，佇台灣tsit-tè民主ê島國頂頭已經tsiâⁿ做潮流，乎台灣本土母語文學ē-tàng（能夠）佇台灣文學ê場域—裡找著i應該有ê尊嚴kap位置。Tsit-má，咱向（ng3）望借tsit-táu策劃「台灣本土母語文學常設展」ê機會，來呈現台語、客語、原住民族語文學ê phong-phài意境，ē-thang（得以）乎咱大眾真知本土母語文學tī台灣文學lāi-té ê內涵kap價值，thang實現「母語重生，族群共榮」ê理念。

常設展一隅。（照片提供：陳理揚）

◎作者簡介：
周定邦，南縣青鯤鯓人。成大台灣文學碩士。Tsím是台灣說唱藝術工作室團長、台灣羅馬字協會常務理事、台文筆會理事。佇國立台灣文學館食頭路。Bat得著南瀛文學獎、教育部母語文學創作獎、教育部推展本土語言傑出貢獻獎等。著作有：《起厝兮工儂》、《義戰噍吧哖—台語七字仔白話史詩》、《斑芝花開》、《台灣風雲榜》、《Ilha Formosa》、《高雄縣傳統戲劇優良劇本徵選集》（合著）等。