編按：此次選刊《首都詩報》之「閱讀府城‧在地文化」講座第六場報導，主講人為前成功大學台文系系主任呂興昌教授，講題為：「阮ê故鄉是南都――台語歌謠ê在地意識」。 又，《首都詩報》自創刊以來，協力推動台語文字標準化，故採用教育部頒訂的「台灣羅馬字拼音」系統為表記方式。本期（第7期）為記念1885年創刊台灣第一份報紙《台灣府城教會報》（今《台灣教會公報》）長老教會巴克禮牧師（Rev. Thomas Barclay M.A. 1849-1935），而全文以傳統教會羅馬字出刊。《嗷》網路雜誌目前則暫因顧及讀者之考量，將部份羅馬字改為漢字，以求更多讀者漸入閱讀佳境。未來刊出更多母語作品、許多詞彙無法以漢字表記時，則以中文加以註釋。

6月初6日佇府城舊冊店3樓，有1場真趣味ê演講（講座）。講者是成大台文所ê呂興昌教授。講題是「阮ê故鄉是南都：台語歌謠ê在地意識」。呂興昌教授佇講座當中saⁿ-kap（相與）分享伊研究台語流行歌ê成果；現場有10幾个文友來tàu鬧熱。一寡音樂界ê人士mā來捧場，像講聲樂家黃南海先生、「二王二后演唱會」ê主唱者王淑汝女士kap黃裕民先生，iáu-koh有退休了來府城定居ê歌á戲作者kap研究者王振義先生，lóng是有心ê聽眾。

呂昌興教授chit幾年teh研究台語流行歌，mā佇學校開chit方面ê課程。伊佇演講起頭án-ne講：「『在地意識』是我一向研究台灣文學ê重點。以前，我khah chiap8（常常）用社會背景kap運動觀點來探討台語歌，毋koh chit-má我想beh ùi文學ê角度來看台語歌謠。」呂教授舉〈南都夜曲〉、〈菅芒花〉、〈運河悲喜曲〉、〈嵌城春月、鄭祠寒梅、安平晚渡〉、〈阮ê故鄉南都〉、〈安平追想曲〉等等名曲，來講歌謠呈現siáⁿ款ê在地風景，koh對歌詞進行具體ê分析，乎逐家了解作詞者án怎kā in ê在地意識表現佇歌詞內底。

首先介紹ê歌是陳達儒作詞ê〈南都夜曲〉。Chit首歌佇真濟人ê心目中是1首chiâⁿ有在地意識ê歌，毋koh呂教授有khah無kâng ê看法。伊提〈南都夜曲〉ê原曲――〈南京夜曲〉出來講，用powerpoint對照2首歌ê歌詞，尤其是歌詞內底ê地理名詞，koh拆陳達儒寫〈南京夜曲〉ê時代背景hām後--來改詞ê可能原因。呂教授認為：〈南都夜曲〉ê歌詞雖然有「南都」、「安平港」chit2个地理名詞，是講對府城chit箍leh-á（這附近）ê景緻khah無具體ê描寫，koh是作者為beh走閃白色恐怖所做ê地理名詞抽換：將中國南京ê相關地名改做台南ê地頭，致使〈南都夜曲〉雖然有南都，卻無應該有ê在地意識。

呂教授介紹ê第二首歌，是許丙丁ê〈菅芒花〉。伊先介紹許丙丁ê文學成就，才放歌；歌放soah koh解釋歌詞。呂教授提起2項趣味ê代誌：頭á項，「kan-na ùi歌詞來講，全台灣lóng有菅芒花chit號物，毋nā咱chia（這裡）有niâ，毋koh許丙丁ê詞有強烈ê在地味，所以大家聽chit首歌，會感受著歌ê『在地』意涵kap在地意識！」第二，呂教授提醒咱逐家：「文學作品hông創造--出-來了後，tō有伊獨立ê性命，會超出作者原底按算ê意思。」許丙丁chit首〈菅芒花〉，乎人當做1首表現台南在地意識ê歌，是歌謠ê性命自然發展ê結果。

呂教授佇講座後場講解〈運河悲喜曲〉、〈嵌城春月、鄭祠寒梅、安平晚渡〉、〈阮ê故鄉南都〉、〈安平追想曲〉。Chiah-ê歌，在地意識koh-khah明顯。〈運河悲喜曲〉ê作詞者葉俊麟，kā發生佇咱台南ê社會事件――1對苦命鴛鴦saⁿ（一起）牽去自殺ê「情事」，寫入去歌詞，乎逐家ná唱ná思考社會傳統價值觀對有情男女ê束縛。Khioh-khí（拾取）在地發生ê新聞題材，歷史事件mā是作詞者寫歌ê靈感來源、kàⁿ-bú（酵母）；許丙丁ê〈嵌城春月、鄭祠寒梅、安平晚渡〉kap陳達儒ê〈安平追想曲〉，lóng是好ê例樣。像講〈嵌〉chit首歌，作者藉幾个台南有名ê地景象徵台灣整體ê滄桑歷史。〈安平追想曲〉ê作者ùi「世界性」ê角度思考「台灣人」ê命運：Hit个等待愛人tò--來、著偎靠人愛ê金小姐，象徵kheh欠自主意識ê台灣人，在來bē得hàiⁿ掉悲情、過新ê生活。

續尾介紹--ê是陳芬蘭演唱、蜚聲作詞ê〈阮ê故鄉南都〉。呂教授用chit-ê例說明：1首有在地意識ê歌，歌詞內底無定著（未必）ài有地號名；有tang時á，會tàng透過在地特有ê人、事、物來表現。〈阮ê故鄉南都〉tō是借少女ê腔口來表現--ê。歌詞寫1位離鄉背井ê少女接著老父ê批，想起細漢時佇南都成長ê美麗記tî。透過少女轉述批信ê內容kap獨白，作詞者kā歌ê在地色彩表現--出-來。

呂教授ê解說kap分析不止á幼路，透過power-point呈現逐首歌詞，koh放歌乎逐家聽、tòe leh唱。時間siú--1下tō過，呂教授精采ê講座tō結束佇beh暗á東門城kha來來去去ê人影市聲--nih。