編按：2010年的舊曆年後，《嗷》將有一系列全新面貌呈現給各位親愛的讀者們，敬請期待！而新的一年，「嗷副刊」繼續刊出更多在國內外打拼的台灣青年們的生活記事外，也會不定期刊出台語文章。 對不熟悉台語文的朋友而言可能是種挑戰，但在這「人人有功練」的年代，希望藉著短篇台語散文的閱讀，讓會講台語的朋友也能感受原來台語也能「書寫」的樂趣；而台語「袂輪轉」的朋友，也請作伙來「練功夫」喔！
首篇台語散文的作者蔡幸紋，為台中教育大學台灣語文系第一屆畢業生，目前是高師大台文所學生也是國小台語代課老師。關於自己在畢業後回到社會的現實裡，常忘記言說母語的心情，她藉著文章提醒自己別忘記母語、別捨棄當初進台語系的初衷……。

自從ùi台語系畢業了後，kan-ná有1大tsām時間無閣用台文來寫文章，blog ê文章時常tiâu佇3、4 ko月前ê代誌，連華語文章嘛罕得update，台語文章更加免講。用台語紀錄生活kap創作文學ê量有愈來愈「懶si」ê趨勢，按呢ê現象時常予家己感覺陷入心虛ê「罪惡感」內底。 總是佇台語系讀四冬ê台語，閣聲聲句句講欲推sak母語支持母語，若是無確實佇日常生活做起，實在無資格講家己kap母語有啥麼治代。

頂禮拜去台中東勢林場參加「台羅會」（註）2010年ê會員大會，tú著真濟台語箍仔ê老師、前輩，嘛有平平台語系畢業ê同學kap學弟妹，普通時大家佇各地無閒，罕得會使khioh-khioh做伙，佇小小ê會場內底人坐kah tīnn-tīnn-tīnn（很滿），大家大聲用台語開講、相借問、唱會歌「台灣翠青」，按呢ê氣氛kap環境予人感覺真自在，著親像1個大家庭仝款。已經想袂起第1遍參加台羅會ê活動是當時，毋過，會記tsit大學時代，丁鳳珍老師攏會叫阮遮無仝學校台語系ê學生（有中教大、中山醫、真理、成大……）去做世界台語文化營（TBI）ê工作人員；對第11屆佇人權綠島「語言kap生態多樣性」、第12屆佇淡水真理「台灣教育愛母語化」一直到第13屆佇彰化天后宮「台語‧生活‧台灣」，連續幾若年無斷過。大家為著營隊愛照顧囡仔營2、30個囡仔，閣愛跳舞、唱歌排練暗會節目，定定嘛攏thiám（累）kah欲反（píng）過。毋過，按呢難忘ê回憶，攏是無仝學校、無仝年級台語系學生歇熱（暑假）ê共同記持。台羅會對阮來講，毋但是1 tīn對母語有認同有意識ê人所組織ê團體，更加是疼惜、鼓勵少年人去親近學習母語ê所在。

今年去參加大會，工作人員已經對較早阮這iân ê同學變做1個1個生份ê面容，甚至是離我幾若屆，阮已經離開學校in遮tú入來--ê幼齒學弟妹。看著in tsit-má做ê khang-khuè（工作），阮當初著是按呢做，忽然間了解「時代交替」原來著是tsit種感覺。想欲過去kap遐學弟妹熟識，hiông-hiông（剎那間）suah毋知欲按怎紹介家己，「我是恁第1屆ê學姊」，「第1屆」聽起來kan-ná有淡薄仔歷史。想當初阮出去外口kā人紹介家己，總是愛開1點仔氣力，人tsiah知影台灣有「台語系」，而且是師範體系學校第1間ê台語系；我是「台中教育大學台語系第1屆」ê學生，彼個口氣有淡薄仔歹勢歹勢，感覺家己是這個系tú生出來ê嬰仔，iáu閣幼tsíⁿ（還很嫩）。想袂到，1目nih這ko月已經是阮畢業了後第2擺ê同窗會，阮有約定每年ê 228是大家佇台中聚會ê日子，大家攏袂記家己已經離開台語系欲uá兩冬。

2004年12月，台中教育大學校慶，台語系tú成立，全系只有40個人，第1屆學生kap第1任班導江俊龍教授合影。

畢業了後，大家攏較罕得聯絡，頭１冬大家攏閣佇國校leh做實習老師，無閒讀冊欲考教師証，tsit-má應該大部分攏開始食頭路，有人佇國校、有人佇安親班、有人佇公司部門、有人佇軍中、有人佇研究所，佇各行各業無同所在leh扑拚，離開台語系ê生活，有真濟時陣咱攏會予現實社會拖leh行，kap人講話用華語、看真濟華語冊、華語節目、聽華語歌，更加免講繼續接觸台語相關活動，甚至用台語ê專長去找著穩定頭路來kā家己飼飽。這可能是真現實ê問題，嘛是真事實ê代誌。

總是，會當做中教大台語系第1屆的學生，家己感覺是人生內底值得保惜ê代誌。「第1屆」對無到有，對40 個人到240 個人，對無人捌咱，到著獎ê成績滿滿是，這其中ê滋味應該是第1屆學生體會上深，「台語」對咱來講是啥麼？是洪惟仁系主任愛咱講話用台語，「講華語罰10箍」；是陳恆嘉老師逼咱1禮拜愛寫1條台語詩；亦是丁鳳珍老師定罵咱無志氣，毋敢勇敢追求家己ê夢，亦是只是四年青春ê歲月，會使提著1張文憑ê所在。台語系第1屆ê學生，「台語」對咱來講到底是啥麼？我發覺當咱畢業愈久，入來ê人愈濟，這個問題著變做真重要。漸漸可能有人會問講，恁中教大台語系第1屆--ê tsit-má攏leh創啥？郵局送批、學校做老師、開店做生理、giú保險、公部門做公務人員、私人公司服務，這攏是有可能ê代誌，大家的興趣kap運途攏無仝款，未來ê代誌是無法度料想會到。毋過，大家kám閣會想起家己曾經是台語系ê學生，kám閣會佇生活內底用台語講話、用台語思考、用台語寫文章、教恁ê囡仔講母語、支持母語運動、關心kap母語有相關ê議題。這可能kap身份地位行業無直接ê關係，毋過，應該是做1個台語系學生ê責任kap態度。

2008年5月，台中教育大學台灣語文系行向第4冬，第1屆學生出業合照，系辦樓頂ê人攏是阮ê學弟學妹。前排倒手爿算來第5位是佇2009年離開阮ê陳恆嘉老師。

老實講，有時陣會感覺台語離家己愈來愈遙遠，若親像已經kā伊放sak，所以時時刻刻愛家己會記得，畢業愈久愈愛kā tsit句話囥佇心肝底。「你敢有kā台語放袂記？」

註：社團法人台灣羅馬字協會（簡稱TLH、台羅會）：佇2001年成立，是全世界關心台灣本土語文ê人共同發起，會員來自各行各業，對本土語言（台語、客語、原住民語）有強烈危機感kap認同感，所以結合台語文相關學校、團體、單位ê力量，固定舉辦營隊、學術研討會、出版刊物，對台灣語言文化有具體實質ê貢獻。